لكلنا و أحنا صغار لين كبرنا نقولوا في كلمات غالطة و معناها ما يتماشاش مع السياق إلي نستعملوه فيها لكن بحكم العرف الداخلي تنتشر اكا الكلمة و تولّي صحيحة لين نكبروا و نبربشوا بش نكتشفوا المعاني الصحيحة للكلمات اذوما والحاجة هذي موجودة في كل لغات العالم حتّى من لغة المصممين. لذلك وفي المقال هذا بش نفسروا مجموعة من الكلمات إلي نستعملوا فاهم في ميدان التصميم وأحنا منعرفوش المعنى الٱصلي ليهم
1.Typeface أو Font
“أمان عندك Fonts جدد مزيانين ؟ “
من أهم عناصر التصميم هي نوع الكتابة إلي تختلف من تصميم لتصميم و يتم إختيارها حسب محتوى التصميم إلي في طور الإنجاز. لذلك فمة كلمة ياسر غالطة نستعملوا فيها و هي كلمة الFont وإلّي هي ما تعنيش نوع الخط بل تعني سمك الخط فقط إلّا أنه نوع الخط يسمّى Typeface
2.الفرق بين الTone و الTint والshades
وهي حاجة بسيطة جدا و الفرق ساهل الTint وهي الألوان النقيّة إلّي نظيفولها الأبيض. أمّا الTone وهي إلي نضيفولها الرمادي بكل درجاته أما ال shades فهي كيف نزيدو الأسود للألوان لذلك لازم نتجنبوا كلمة colors للإستعمال الشامل
3.Adobe Illustrateur أو Adobe Illustrator
Adobe Illustrateur أو Adobe Illustrator في الترجمة الزوز كلمات متطابقين بالفرنسيّة illustrateur و بالإنجليزيّة illustrator لكن شركة Adobe كيف صنعت البرنامج مقامتش بترجمة الإسم بحتّى لغة لذلك يستحسن إستعمال إسم البرنامج بلغته الأم و إلّي هي Adobe Illustrator
4.Pictogram أو Ideogram
لحقيقة في التعليم الأكاديمي إستعمالنا كلمة Icons و إلّي هي عامة جدّا أو كلمة Pictogram وإلي هي ماتعنيش أي أيقونة نستعملوا فيها لذلك كمصمم محترف لازم تكون عندك دراية بالمصطلحات بش تكون دقيق كيف تبدا تحكي على تصميمك أو مع حريف لذلك لازم نعرفو الفرق مابين ال Pictogram و ideogram : الPictogram هي أيقونة ترمز مباشرة للفكرة إلي في التصويرة ونستعملوها عموما في إشارات المرور و العلامات الإرشاديّة لكن ال ideogram متعنيش فكرة مباشرة وميستطيعش إنسان موش مواكب تطوّر الدنيا بش يتعرف علاهم و أكثر الأيقونات المستعملة في حياتنا هوما ال ideogram
____________________________________________________
كانت هذه بعض الكلمات إلي كنا فاهمينهم بالغالط و مزال الكثير. إنت زادا كان تعرف كلمات أخرى شاركنا بيهم في التعليقات.
بقلم : عبد الحميد البخاري
Thumbnail By : Tang Yau Hoong
