هات نبداو بتعريف المصمم:
هو مكينة أوتوماتكية متاع فن, إبداع و تصميم، ما عليك كان تقلو شنوة حاشتك و لوقتاه و هو يصمملك لي تحب عليه بالظبط. المصمم عندو سر فشلو أكبر العلماء في تفسيرو، و هو إنو قادر على قرائة أفكار حرفائه. ومن أهم مميزاته يخدم بسرعة فائقة مع ضمان جودة عالية وإبداع فوق الخيال.
و هذا الكل ببلاش، مجانا، gratuitement, for free.
في النهاية هو إنسان آلي الفلوس ما تَعْنِيلُو شئ. و كان شديت صحيح بش تخلصو تنجم تَعْمَلُّو ”إشهار” ”publicité”، أو تخلصو حاجة رمزية.
صدقتو؟ أكيد لا! هات نرجعو للواقع…
المصمم هو إنسان يستحق للفلوس بش يعيش و يتعايش، ياكل، يسكن، يخلص فاتوراتو، يشري معدات بش ينجم يوفر خدمة في المستوى و يتفرهد بش ينجم يِخَدِّمْ مخو و يلهم نفسو بش يبدع في خدمتو…. هو إنسان يكرس حياتو و مخو في خدمتو لي يحبها، لذا من الظلم إنا نستغلو حبو و غرامو لمصالحنا….
و توة نقدمولك 5 أسباب لازمك تخلص على خاطرهم المصمم و تعطيه حقو:
1/ التصميم هو مصدر قُوتِهِ:
التصميم ماهوش مجرد هواية و غرام فقط! هو مصدر قوتهم اليومي، بش يِعِيشُو و يِعَيْشُو عائلاتهم، حتى لو كان التصميم هو خدمتهم الثانية… بالظبط كيما الطبيب و التاجر و عامل النظافة، قدملك خدمة. لازمك تعطيه حقو و تخلصو بمقابل مالي.
2/ يِكَرْسُو وقتهم و فلوسهم لتعليم التصميم سواء في الجامعة أو بدورات تكوينية:
التصميم، الإبداع و الفن ماهمش موهبة يتولدو بيهم المصممين، هي نتيجة عن أعوام دراسة و تدريب و “من طلب العلا سهر الليالي” و قام بكري الصباح بش يحضر الدروس. و لي يقول تعليم, مهما يكون في تونس أو خارجها، و حكومي أو خاص، المتعلم لازمو فلوس بش يقرى و يتنقل و يشري المعدات اللازمة إلخ…
3/المعدات لي يصمم بيهم ماهمش بلاش:
من غير حاسوب عالي الجودة و الكرسي و المكتب، و يمكن ساعات حتى ال tablette graphique، و الأنترنات و الضوء، و إلي يتكلفو على الأقل 6 آلاف دينار بفلوس تونس، المصمم ما ينجمش يخدملك شئ. هذا و بغض النظر على صيانة المعدات و على تعطيلات المعدات لي تنجم تصير في أي وقت، و لي لازم المصمم يصلحهم بالفلوس.
4/ يخسر نظرو, و راحت بدنو:
صحيح التصميم لايستحق جهد بدني، على كل حال المصمم يقضي طوال اليوم وهو جالس على كرسي، قدام حاسوب، بحذاه ماكلة، يسمع في موسيقى مزيانة و يبدى يصور و يبدع… و قتلي هذا الكل الناس تعملو في أوقات فراغهم بعد ما يروحو مالخدمة بش يرتاحو….
ما تغلطش، و ما تقارنش! أغلب المصميمين يعانون من مشاكل صحية من أهمها:
– النظر، بمشاهدتهم لشاشة الحاسوب طوال الوقت، و خاصة لتركيزهم في تفاصيل التصاميم لي أي إنسان غير المصمم ما يلاحظهمش و هذا بش يضمنولك جودة عالية.
– آلام في الظهر، لجلوسهم الدائم على الكرسي.
لذلك المصمم في حاجته إنو يمشي للطبيب و يخلصو، و يشري الدواء.
5/ المصمم يحرق مخو و يخسر برشا وقت لإيجاد فكرة التصميم:
كيما قلنا في المقدمة، المصمم ماهوش إنسان آلي أو ماكينة، والتصميم ماهوش علم دقيق “science exacte” بش تاخو منو إجابة سريعة و مؤكدة . المصمم بش يوصل للفكرة لي بش يتركز عليها التصميم و بش يلقا نتيجة تعجبك و تعجبو لازمو برشا أبحاث و إلهام، و لازمو يعرف أكثر معلومات على موضوع تصميمك. و هذا يستحق مجهود معنوي و لي يتركز على السنوات لي قراهم، السعات و الليالي لي سهرهم و ما رقدهمش, بش ينجح للوصول للفكرة المناسبة و المتكاملة.
في الأخير، التصميم هو عمل نبيل، جاء بعد سنوات دراسة و تعليم، بمعدات عالية الجودة، ومن برشا و قت للبحث و الإلهام، و هذا الكل ينجم ينجر عنه مشاكل صحية. لذلك جاء الوقت بش نقدرو خدمة المصمم كأي خدمة أخرى، و نعطيوه حقو. و لكن هذا ما يمنعش زادة إلي فما برشا حرفاء يقدرو الخدمة هذي, و يعطيوه حقو على أكمل وجه.
بقلم: سارة قلفاط
