5 حاجات مهمة في نجاح freelancer و لكن حد ماعطاها أهمية
تحب تولي تخدمfreelance و بديت تحضر في portfolio متاعك و تتعلم في حجات جديدة… و إلا ديجا تخدم freelance في مجال التصميم أو أي مجال آخر في الإعلامية (développeur, data science, …)
فما حاجة بش نحكيو عليها في المقال هذا، برشا ما يعطيوهاش أهمية و لكن عندها تأثير كبير على مردود خدمتنا و على نفسيتنا، وإلي هي المحيط إلي تخدمو فيه، لازم يكون محيط يتماشى مع شخصيتك و مع مصدر إلهامك.
1/ مكان العمل
إن كان الدار، القهوة، coworking space… لازم تختار مكان تلقى فيه راحتك و إلهامك. و مافيها باس كان سعات تبدل المكان خاصة كان حسيت روحك فديت و تخدم في خدمة مع حريف خانقك، تبديل السروج فيه راحة. وحتى كانك محصور بحاسوب bureautique، بدل حتى مالبيت أو ترتيب المكتب متاعك
2/ الزخرفة
ال déco لازمها تكون تعبر عليك و تحسك بأمان و راحة، كيما مثلا إنت إنسان تحب برشا الطبيعة تنجم تحط تصويرة أو تصاور للطبيعة في بلاصة مقابلتك، أو تحط نباتات بحذاك و تتلها بيهم…
تختار ألوان و أشكال تتمشى مع شخصيتك و إلي يلهمك، و مهم زادة إنك سعات تبدل تفاصيل مثلا تبدل بلاصة حاجة معينة، تنجم تفرق و تبدلك المود،
3/ الفوضى أو النظام؟
و موش بالضرورة لازم يكون المحيط ديما منظم و كل شئ في بلاصطو، خاطر فما برشا ناس و خاصة الفنانين و المبدعين الفوضى تجيبلهم الإلهام، المهم إنو المحيط يكون نظيف، و ما فيها باس كان على الأقل مرة في 2 أسابيع أو كيف تكمل مشروع مع حريف، تنظم الفوضى و تلوح الزائد و ممكن تلقا ورقة أو sketch، أو أي حاجة كنت تلوج عليها و تلقاها وقتها، و أهم حاجة كي تنحي الفوضى بش تنحي معاها برشا موجات سلبية. و هذا ما يعنيش إلي لازم تكون في محيط فوضوي، و لكن إنت و شخصيتك و طبعك تختار و لكن ركزنا على الفوضى خاطر الأغلبية منا فوضاويين 
حتى المحيط الإفتراضي عندو أهمية كبيرة في راحتنا و إلهامنا:
4/ Fond d’écran
أي نعم حتى خلفية الشاشة عنها أهمية و تأثير كبير برشا زادة، على خاطرنا ديما من شاشة لشاشة، حاسوب، هاتف، لوحة محمولة…. لازم سعات نبدلو خلفية الشاشات بش نحسو بإلهام جديد، و روح جديدة، و من المستحسن ديما نحطو تصاور إلي يلهمونا و في نفس الوقت ما يقلقوش في العين.
5/ تنظيم الملفات في الحاسوب
صحيح قلنا الفوضى في محيطك سعات تنجم تعاونك على الإلهام حسب شخصيتك و نفسيتك، و لكن الفوضى في الحاسوب أو الdrive أو أي بلاصة تحط فيها ملفاتك، لاااااازم تكون منظمة! على خاطر الفوضى بش تضيعلك برشا وقت في خدمتك، وقت إلي تضيعو في التلويج على ملف معين أو خدمة، بش تخسرك وقت حتى و كان إنت تشوفو بعض الدقائق، و لكن بعض الدقائق تتراكم، و كنت تنجم تستغلها في برشا حجات كيما إنك ترتاح ولا تاكل…. و الفوضى هذي تنجم تسببلك في ضياع برشا خدم خدمتهم، و لا حتى تخدم فيهم. و ما تنساوش ديما أعملو disque dur externe و إلا drive يبداو منضمين تحطو فيهم خدمكم و مشاريعكم كيف تكملوهم و عمركم ما تلوحو حتى خدمة حتى كان ما عجبتكمش!
و نختمو هذا المقال بمقولة المصمم Charles Emaes:
“التفاصيل مهاش تفاصيل. هي إلي تخلق التصميم” و أنا بش نزيد عليها “بل تنجم حتى تبدل حياتنا“
