فيلم خيالي يعيشك في عالم سحري كأنو من الجنة … ENCANTO
| اسم الفيلم | ENCANTO |
| تاريخ الصدور | 24 نوفمبر 2021 |
| بلد الإصدار | الولايات المتحدة, كولومبيا |
| تصنيف الفيلم | رسوم متحركة |
| إخراج الفيلم | بيرون هوارد |
| الشركة المُنتجة | أفلام والت ديزني |
موش بش نحكيو برشا على 3D خاطر مع Disney معادش عندها حدود، حاجة أكثر من perfection، بش نخليوكم فقط مع بعض الصور إلي ،تبين مدى الدقة.
الموسيقى تعيشك في عالم الفيلم و تخليك تغطس معاهم و تولي فرد من العائلة، موسيقى تنجم تسمعها في أي وقت و إنت تخدم، في النقل، تقضي… الريتم ياسر مزيان و محفز. و باز عرضوكم على الtiktok فيديوهات بالأغاني متاع الفيلم إلي عملت الbeuz.
و أهم حاجة السيناريو، آش بش نحكي و آش بش نخلي… يحكي على عائلة Madrigal إلي عايشة في الخير بسبب السحر و كيفاش تعاون في سكان القرية الكل بمواهبهم السحرية. موش بش نلخصلكم و لكن نحب نقلكم إلي الفيلم هذا يعلمنا قيمة العائلة في حياتنا، و مدى حب العائلة مهم، رغم إلي سعات يجيو ضدنا في حجات و نحسو بالظلم و لكن كلو في مصلحتنا. و علمنا قيمة حب الوطن و إلي فالإتحاد قوة كان نحبو نقدمو ببلادنا و المكان إلي ننتميولو.و كذلك تطرق إلى موضوع اللاجئين و النازحين بطريقة إيجابية و بمعاناتهم النفسية لفراقهم بلدانهم و كذلك يعلمنا أهمية إنك تمن بروحك و بالصوت الباطني، و تسكر أذنك على كل إنسان يقلك إنك فاشل.
كذلك الفيلم هذا أنا شخصيا حسيتو يشبه التوانسة في تركيبة العائلة. الناس الكلنا عنا الشخصيات هذي في عائلاتنا:
الجدة: كبيرة العائلة إلي حد ما يكسر كلمتها،
النسناسة: إلي مايفوتها شئ و ماتنجمش ماتعاودش إلي تسمعو،
الأم: ربت البيت إلي ديما غاطسة في الكوجينة و إلي لاهية بالناس الكل و تخاف عليهم،
الطفلة :إلى ديما يقضيوها و ما يخليوهاش تهمل خاطر يخافو عليها،
الdrama queen إلي غنيا عن التعريف…
الطفل الصغير المدلل من العائلة الكل،
الطفلة الدلولة المزيانة و مثال في الأناقة و التربية إلي ديما يخطبو فيها،
الطفل المشاكس إلي ديما بعمايلو،
الأخت الكبيرة إلي حد ما يتلفتلها و إلي ديما يقضيو فيها في كل شئ و حد ما يخاف عليها خاطرها حربية،
راجل العمة أو الخالة إلي عاملة فيه و إلي تقولو يقلها الله يبارك….
و برشا شخصيات أخرى، فاش تستنا بش تتفرج في الفيلم و طلع كل شخصية ملي وصفناها شكوني.
